Kolegio Ehekutivo di Boneiru den un karta fechá 6 di aprel na Minister di Asuntunan Interno i Relashonnan den Reino, ta pidi pa hasi dia 30 di aprel dia ofisial liber. E lei laboral 2000 BES ta e punto di salida pa loke ta trata dianan ofisial liber. Gabinete Hulandes for di 2015 a indiká disponibilidat pa yuda traha pa hasi Dia di Rincon dia ofisial liber. Kolegio Ehekutivo mester indiká di ki forma nan lo ke hasi esaki: sea kambia un dia ofisial eksistente; selebrá dia di Rincon riba un dia di fiesta eksistente òf krea un dia adishonal ofisial di fiesta.
Pa krea un dia di fiesta èkstra ta nesesario pa haña entre otro sosten di (representantenan di) dunadónan di trabou i trahadónan na Boneiru. For di un komunikado di prensa fechá 15 di aprel 2018 di BBE, BHG, Kámara di Komersio Boneiru i Usibo, por a konkluí ku no tin e sosten aki ahinda.
Kolegio Ehekutivo por disidí ku nan ke kambia e dia liber despues di marcha di karnaval pa un otro dia liber. Di e forma aki e djaluna despues di karnaval por keda kambiá pa Dia di Rincon. Esaki ta un solushon relativamente simpel ku tin tambe e sosten di representantenan di dunadónan di trabou i trahadónan na Boneiru. E inisiativa pa esaki ta sintá enfátikamente serka Kolegio Ehekutivo di Boneiru.
Anteriormente mustra riba esaki kaba den kartanan ku Sekretario di Estado di SZW i e Minister di e tempu ei di BZK a manda na 2015, 2016 i 2017. Esakinan te ku awor no a kondusí na un desishon di parti di Kolegio Ehekutivo.
Sekretario di Estado di SZW a bolbe ripití e yamada ku a hasi na Kolegio Ehekutivo pa tuma un desishon, pasobra ela tuma nota ku ainda tin inklaridat i inkietut den komunidat di Boneiru riba e tópiko aki. Sin un desishon di Kolegio Ehekutivo no ta posibel pa hasi dia di Rincon un dia di fiesta ofisial.