Komo konsekuensia di pasashi di e horkannan Irma i Maria na Sint Eustatius i Saba, a surgi un retraso bastante grandi den tratamentu médiko i konsulta spesialisá den eksterior pa aseguradonan di Sint Eustatius i Saba. Un kombinashon di faktor, inkluyendo entre otro daño ekstenso na aeropuertonan di Sint Maarten/Saint Martin, daño na e Sentro Médiko St. Maarten (SMMC), Hospital Fleming Constant, interupshon di buelonan regular entre e islanan a pone ku a surgi un akumulashon di personanan ku ta pendiente pa bai konsulta òf risibí tratamentu médiko den eksterior.
ZVK, den estrecho konsulta i kooperashon ku dunadónan di kuido manera Fundashon Maridal (Bonaire), Hospital Dr. Horacio Oduber (Aruba), Instituto Médico San Nicolás (ImSan, Aruba) i Hospital St. Elisabeth (Curaçao) a sòru pa tur asegurado di Sint Eustatius i Saba ku tabata den nesesidat di atenshon médiko agudo, haña esaki tambe di forma rápido i adekuá. Pa e aseguradonan ku tabatin mester di kuido intensivo riba término largu, manera por ehèmpel pashèntnan ku mester dialisá, a tuma tur e medidanan nesesario pa por garantisá e kuido aki tambe.
Entre tantu e situashon ta stabilisando polo poko. Despues di un evaluashon ekstenso di aspektonan infrastruktural di e fasilidatnan médiko na Sint Maarten/Saint Martin i, despues di amplio konsulta ku dunadónan di kuido na Sint Eustatius, Saba, Sint Maarten/Saint Martin, Guadeloupe, Aruba, Bonaire i Curacao, a yega na e desishon pa entrante djaluna 23 di òktober, reanudá baimentu afó pa tratamentu i/of konsulta médiko den eksterior pa aseguradonan di Sint Eustatius en Saba.
ZVK lo hasi esfuerso pa eleminá e retraso ku a surgi pa loke ta trata konsulta/tratamentu médiko den eksterior di e siguiente manera:
• Den konsulta estrecho ku dòkternan di kas, lo surti i duna prioridat tur asegurado di Sint Eustatius i Saba ku te ku 14 di òktober tabata para registrá den e sistema di ZVK pa bai afó pa konsulta of tratamentu médiko a base di e destinashon i urgensia pa risibí tratamentu/konsulta;
• Ofisina di ZVK na Sint Eustatius i Saba lo tuma kontakto personalmente ku tur asegurado ku ta para ariba e lista pa bai afó pa tratamentu médiko pa informá nan di e fecha i destino unda nan ta bai pa konsulta/tratamentu;
• Aseguradonan lo biaha sea ku buelo regular òf ku buelo charter pa nan destino unda nan ta bai risibí tratamentu of konsulta médiko;
• Debi ku na e momentonan aki teknikamente no ta posibel pa efektuá pago di kompensashon diario, ZVK a sòru pa tur asegurado ku tin ku bai Sint Maarten/Saint Martin òf Bonaire pa tratamentu médiko risibí alohamentu den un hotèl ku un plan di kuminda (3 biaha pa dia). Den kaso ku e asegurado tin ku regresá su isla riba mesun dia (dagbehandeling), lo sòru pa e risibí un kuminda balansa.
ZVK ku esaki ta hasi su esfuerso pa promé ku fin di aña eliminá e retraso ku a surgi pa loke ta konsulta òf tratamentu médiko den eksterior pa aseguradonan di Sint Eustatius i Saba. ZVK ku regularidat lo tene su aseguradonan informa via medionan di komunikashon i otro kanalnan di desaroyonan rondó di e situashon eksepshonal aki.
ZVK ta hasi un apelashon na tur asegurado ku kier mas informashon, pa tuma kontakto ku su ofisina na Saba: Clement Sorton Street , telefon +599 416 3552. Na Sint Eustatius: , Cottageweg z/n, telefon +599 318 3379, +599 318 3381, +599 318 3375. Of e-mail: info@zorgverzekeringskantoor.nl . Bishitá nos wèpsait: www.zvkcn.nl