WILLEMSTAD, – Dia 10 di yüli 2020, Konseho Sosial Ekonómiko (SER) a aprobá un reglamentu di òrdu aktualisá. E reglamentu aktualisá aki ta regulá e modalidatnan di funshonamentu i di trabou di SER teniendo na kuenta e kambionan legislativo i desaroyonan nobo ku a bin ta tuma lugá for di e fecha di transishon di 10 di òktober 2010. Konsekuentemente, e reglamentu nobo ta supstituí e reglamentu di òrdu di 2009, kaminda SER ainda tabata un órgano konsultivo permanente di pais Antia Hulandes.
E reglamentu di òrdu aktualisá di SER ta den konkordansia ku artíkulo 21 di e Ordenansa riba huntanan konsultivo (A.B. 2010, Nº 87, apèndix g) i algun artíkulo di e Ordenansa ku ta instituí SER, manera modifiká pa medio di Gazeta Ofisial 2017, Nº 70.
E reglamentu aktualisá ta inkluí términonan nobo di notifikashon pa reunionnan di SER, un forma nobo di presentá relatonan di e reunionnan i e posibilidat ku reunionnan por tuma lugá di un manera virtual bou di sirkunstansianan eksepshonal.
