Empresario i personanan ku a pèrdè trabou pa motibu di e krísis di corona, ta haña sosten finansiero durante e lunanan benidero tambe. Ta prolongá tantu e areglo di emergensia di SZW pa sosten den gastunan salarial, komo e kompensashon di EZK pa gastunan fiho di negoshi, te ku mas tardá 12 di òktober 2020. vvAreglo di emergensia SZW vPa evitá ku dunadónan di trabou ta haña nan mes obligá pa kita empleado, nan por a hasi uso kaba di e areglo di emergensia di SZW den e periodo di 13 di mart te ku 12 di yüni 2020. Empresarionan independiente òf personanan ku a pèrdè trabou pa motibu di e epidemia di corona, tambe por a bini na remarke pa e areglo aki. En konekshon ku e impakto kontinuo di e medidanan rondó di e vírùs di corona, ta prolongá e areglo aki.
Dunadónan di trabou ku ya ta hasi uso di e areglo, no mester hasi un petishon di nobo. Sí, nan mester entregá un deklarashon den kua nan ta indiká e situashon di personal sperá te ku 12 di òktober 2020. Tambe si e situashon kompará ku nan aplikashon promé no kambia, nan mester entregá e deklarashon. Despues ku unidat SZW di RCN a risibí e deklarashon i despues di a prosesá e datonan, por sigui ku prosesamentu di e siguiente pagonan.
Empresarionan independiente i èks empleado ku ta risibí e kompensashon riba nan nòmber propio, no mester entregá deklarashon. Si surgi kambio ku ta resultá den entrada atrobe pa nan, nan mester mèldu esaki na unidat SZW di RCN, meskos ku ta e kaso awor.
Kompensashon EZKvEmpresarionan afektá pa e medidanan di corona i ku tin di aber ku gastunan fiho haltu den e periodo di 13 di mart te ku 12 di yüni 2020, por a bini na remarke pa un kompensashon di Ministerio di Asuntunan Ekonómiko i Klima (EZK) for di 23 di aprel último. E kompensashon ta den forma di un pago di 4400 dòler òf 2200 dòler di un solo bia. Komo ku e ministerio di EZK no tin un instansia di ehekushon na Hulanda Karibense, e unidat SZW di RCN ta ehekutá e areglo aki.
Unidat SZW ta den kombersashon ku e ministerio di EZK, Kámaranan di Komèrsio lokal i representantenan for di industria i komèrsio pa mira di ki manera por duna kontenido na e prolongashon di e kompensashon aki. E prolongashon lo toka e periodo di 13 di yüni te ku 12 di òktober 2020. Pa por ehekutá e areglo, medidanan na midí pa Hulanda Karibense ta nesesario.
Informashon adishonalvManera ku e kondishonnan eksakto ta konosí, lo kompartí esakinan via www.rijksdienstcn.com/covid-19 bou di ‘Pakete di emergensia di gobièrnu’. Lo publiká e formulario di deklarashon pa prolongashon tambe aki. Pa pregunta òf konseho, empresarionan na Boneiru por dirigí nan mes na Kámara di Komèrsio via steunloket@kvkbonaire.com.
