E komportashonnan kastigabel ku ta okurí mas tantu bou di hóben na Hulanda Karibense ta ladronisia i kore outo sin reibeweis. Esaki ta sali for di investigashon di e Sentro di Investigashon i Dokumentashon Sientífiko (WODC, Wetenschappelijk Onderzoek- en Documentatiecentrum). Organisashonnan den e kadena penal ta positivo tokante e introdukshon di e derecho penal hubenil na Hulanda Karibense. Ku esaki ta skohe pa un enfoke pedagógiko serka persona hubenil ku ta kometé echo kastigabel.
Pa prepará pa e introdukshon di e derecho penal hubenil na Hulanda Karibense WODC a investigá e índole i grandura di e echonan kastigabel ku menornan di edat i adultonan hóben tabata kometé na 2018. Tabata trata di un total di 105 persona hubenil den e gruponan di edat di 12-18 i 18-21 aña, ku a haña nan den kontakto ku hustisia. E echonan kastigabel ku ta okurí mas tantu ta ladronisia i kore sin reibeweis. Pa mas di mitar di e personanan hubenil tabata e promé bia ku nan a bini den kontakto ku hustisia.
For di e investigashon di WODC ta sali tambe ku organisashonnan den e kadena penal ta positivo tokante e introdukshon di derecho penal hubenil na e islanan BES. Derecho penal hubenil ta ofresé mas posibilidat pa duna persona hubenil bon yudansa i guia. Asina partnernan den e kadena tambe a prepará kaba pa e ehekushon di derecho penal hubenil, por ehèmpel siguiendo kurso i training.
Derecho penal hubenil: stimulá hóben pa un kambio positivo di kondukta
Ounke e derecho penal aktual na Hulanda Karibense tin stipulashon ekstraordinario pa hóben te diesocho aña, ainda no ta eksistí derecho penal hubenil separá. Esaki regularmente ta kousa ku hóbennan ta haña e mesun kastigu ku adulto òf ku no ta trata kasonan di hubentut mas aleu. Asina e hóbennan no ta haña e guia adekuá pa evitá ripitishon.
Ku e introdukshon di derecho penal hubenil lo bini mas posibilidat ku ta kuadra ku hóben pa dil ku kondukta kastigabel. E preparashonnan pa esaki ta den ful swin. Ta ferwagt ku e aña aki mes lo introdusí derecho penal hubenil na Hulanda Karibense. Ku esaki lo afiliá na e puntonan di salida di e Tratado Internashonal di Derecho di Mucha (IVRK).
Karakterístiko pa derecho penal hubenil ta e enfoke pedagógiko i e ‘despacho fuera di hustisia’ pa delito leve, komparabel ku e kastigu Halt na Hulanda Oropeo. Esaki ke men ku un kastigu pa un delito leve manera destrukshon, falta skol òf kore outo sin reibeweis tin un karakter edukativo. Ta despachá e kastigu aki pafó di korte, pa asina e hóben no haña un ‘strafblad’ mesora. Un medida di kastigu asina tin e meta sí pa influensiá e kondukta positivamente, mehorá e ambiente di e persona hubenil i evitá ripitishon di kondukta kriminal.
Den kaso di delito pisá por imponé detenshon hubenil. Esei ta un kastigu di prizòn pa hóben i lo sosodé solamente komo último rekurso, si no tin otro posibilidat.