No ta nesesario pa laga mucha te ku 17 aña tene distansia sosial ora di hunga, hasi deporte òf ora nan bai skol atrobe entrante 11 di mei. No tin indikashon ku mucha ta hunga un papel relevante den e transmishon di e vírùs pa famia i otronan, asina ta resultá for di investigashon di epidemiológiko mundialmente.
Esaki ta nifiká ku masha poko bia ta sosodé ku hendenan ta keda infektá na kas pa un mucha ku ta bai skol. RIVM banda di esei ta mustra ku na Hulanda i otro paisnan, ménos ku 1 porshento di e pashèntnan ku coronavírùs, ta menor di 20 aña.
For di investigashon a resultá por sierto si ku muchanan por ta kargadó di e vírùs. Sinembargo, e riesgo ku nan ta traspas’é pa otro mucha i adulto, ta chikitu. Mester evitá e riesgo chikitu ei dor di apliká higiena di man korekto i di tosamentu serka muchanan. Adultonan mester siña muchanan pa tosa i nister den kokoti di man òf den un lensu di papel. Mester tira e lensu despues mesora afó. Mucha- i maestronan ku ta malu ku keintura i/òf tosamentu mester keda kas te ora tur síntomanan pasa.
Mas aleu ta importante pa muchanan siña laba man regularmente i bon, promé nan bai skol, durante skol òf despues di hasi deporte i mesora ora yega kas bèk for di skol. Esaki mester sosodé ku un sèrbètè limpi òf un sèrbètè di papel.
Un otro bon motibu pa no apliká distansia sosial pa mucha, ta e efektonan negativo ku e medidanan aktual tin riba nan desaroyo. Muchanan ta adaptá nan mes rápido na nan ambiente nobo i ta aseptá e realidat nobo komo ‘normal’. Esaki ta nifiká ku e muchanan ta siña ku ta normal ku nan no por bai skol, no mag hunga ku otro, no mag hasi deporte i no mag di tin kontakto físiko. Muchanan pa e motibu ei ta lanta ku un imágen robes di sosiedat. Di e manera akí nan no ta desaroyá nan mes komo individuo sosial, ku posiblemente konsekuensia desbentahoso.
Muchanan tin mag di ta gewon den klas i hunga pafó. Gruponan grandi di mucha pegá riba otro no ta konsehabel, partikularmente paden no. Si e espasio pafó ta sufisiente grandi e muchanan tin mag di ta huntu pafó. Si e espasio pafó ta chikitu e ora ei ta mihó pa separá gruponan for di otro.
Pa e adultonan na skol si e regla di distansia sosial di 1,5 meter ta na vigor.
Skolnan habrí atrobe
A tuma e desishon pa laga muchanan bai skol atrobe entrante 11 di mei, entre otro pa motibu ku pa algun mucha no ta seif pa nan tin ku keda kas henter ora. Den sierto kaso e hogar ademas no ofresé un bon ambiente pa siña. Ta resultá ku no ta tur mayor por duna guia adekuado i ku skol no ta alkansá tur mucha. Ademas enseñansa na kas ta ménos aksesibel pa mucha den situashon vulnerabel i tin ménos sosten di mayor. No ta tur hende tampoko tin kòmpiuter i internèt ku mester; den e kasonan akí hopi bia tin falta di instrukshon di dosente. Ku otro palabra, dor di seramentu di e skolnan algun siman pasá, hopi kos a bai for di kòntròl. Mayornan a haña un enkargo adishonal pa motibu ku muchanan tabata na kas i mester a yuda nan ku enseñansa na kas. Banda di esei nan mester a regla mas bia hende pa wak yu.
Habrimentu di skolnan bèk ta bon tambe pa ritmo di e muchanan i e desaroyo kognitivo i sosial. Dosentenan ademas por tira bista mas riba bienestar sosial i emoshonal di alumnonan i unda ta nesesario ofresé sosten inmediato. Awor por hunga atrobe ku amigu- i amiganan. Ora muchanan ta na skol e ta un alivio pa mayornan. Na skol muchanan ademas por papia ku otro den un ambiente seif tokante Covid19, i kompartí nan eksperensianan di e último simannan. Ku habrimentu di skolnan ta logra tambe ku mas òf ménos 800 alumno ku ta bai skol ta haña desayuno na skol atrobe tur dia i asina nan ta sigurá di un komienso salú di e dia.