Studiantenan nobo di Wardakosta ku ta siguiendo e estudio di ‘Basis Opleiding Kustwachter’ (BOK) ta duna un man na esnan den nesesidat pa motibu di e krisis di corona. Tur e studiantenan a regresá kas na momentu ku a tuma desishon pa sera e fronteranan. Unabes ku nan a yega kas e studiantenan a skohé pa duna un man boluntario na habitantenan ku tin mester di yudansa den nan komunidat. Tin diferente instansha na Aruba, Kòrsou i St. Maarten ku a start ku initiativanan pa hasi trabou boluntario pa yuda habitantenan i animalnan. E yudansa ta ser hasi den forma di paketá e paketenan di komestibel, parti e paketenan di komestibel i reskatá animalnan.
Na Boka Ascension na Kòrsou e studiantenan a bai yuda detektá turtuganan ku ta den peliger. Hopi ta e turtuganan ku a keda pegá den e sargassum den e bahia di Boka Ascension. Sea Turtle Conservation Curaçao a hasi un apelashon pa fasilitá nan ku buskedá i reskate di e animalnan aki. E studiantenan a bai yuda ku entre otro detektá e animalnan ku ta pegá den e sargassum pa asina otro boluntarionan por a baha na laman i reskatá nan. E boluntarionan di CITRO tambe a yuda ku e operashon usando nan drones nan pa detektá e animalnan ku ta pegá den e lima di sargassum. Na Aruba e hòbennan a duna un man pa traha paketenan di komestibel i desinfektá bakinan pa por yena ku komestibel na Fundacion pa nos Comunidad. I na St. Maarten nan a sostené K1 Britannia na momentu di hasi entrega di paketenan di komestibel na personanan den nesesidat. E studiantenan di BOK ta entusiasma i ta hasi nan máksimo esfuerso pa por duna un man na personanan i animalnan ku a ser konfrontá i mester yudansa den e krisis.
