Den kuadro di e esfuersonan pa manehá e situashon rondó di COVID-19, Centrale Bank van Curaçao en Sint Maarten (CBCS) –den su esfuersonan pa antisipá i mitigá posibel riesgonan – a tuma algun medida di prekoushon pa salbaguardiá e seguridat di su empleadonan, klientenan i públiko en general. A disidí ku entrante djamars 17 di mart empleadonan ku no ta ehersé un funshon krusial mester keda kas i ehersé nan tareanan for di kas por lo ménos e siman aki. Pa hasi esaki posibel CBCS ta implementá e fasilidatnan nesesario. Djabièrnè 20 di mart e situashon lo wòrdú evaluá i lo duna instrukshonnan nobo na e empleadonan. CBCS ta garantisá ku e medidanan aki lo no afektá su tareanan primordial. CBCS ta sigurá ku e medidanan aki lo no influensiá e tareanan primordial di CBCS. Te ku asina leu no tin sospecho di ni kasonan di infekshon ku e vírùs di COVID-19 entre empleadonan di CBCS.
E departamento di Kaha lo keda será por lo pronto. Esaki ta enserá ku lo no bende monedanan (konmemorativo) ni biyetenan. Tampoko tin posibilidat pa interkambiá monedanan i biyetenan danifiká. E tasa di kambio di moneda lo keda anunsiá diariamente riba wèpsait di CBCS. Reunionnan, eventonan i kursonan den luna di mart ku no ta urgente ta kanselá. Akuerdonan pa uso di e salanan di CBCS pa públiko durante di luna di mart tambe a keda hala aden. Ku e medidanan aki e akseso di públiko riba tereno di CBCS a keda minimalisá. E medidanan aki ta bálido pa e ofisinanan di Kòrsou i Sint Maarten. Nos mester uni forsa pa evitá ku e vírùs di COVID-19 ta sigui plama i p’esei nos ta konta ku bo komprenshon i aporte.
