Representantenan di OCW na Hulanda Karibense a entregá den e pasado simannan na Sint Eustatius, Saba i Boneiru e promé Manualnan di Personal imprimí na e direktivanan di skol. E dosentenan entretantu tambe a risibí un ehemplar di e manual aki.
E Manual di Personal ta destiná pa e personal den enseñansa ku ta den servisio na Boneiru, Sint Eustatius i Saba serka un skol públiko òf enseñansa speshal ku Gobièrnu Sentral ta finansiá. Personal den enseñansa ke men: e direktor, e direktor suplente, e dosentenan i e personal di apoyo den enseñansa. E meta di e manual ta pa klarifiká kua kondishonnan laboral ta aplikabel pa e personal den enseñansa i pa promové ku ta ehekutá e akuerdonan di kondishonnan di trabou pa e skolnan korektamente.
Sinembargo, e manual no ta duna informashon detayá tokante e aplikashon di e kondishonnan laboral den situashonnan spesífiko. Semper lo por tin pregunta tokante e aplikashon konkreto di un areglo den un situashon partikular. Por presentá preguntanan adishonal na OCW na Hulanda Karibense via e e-mail adrès: ocw@rijksdienstcn.com.
Hefe di servisio interino Maritsa Silberie di OCW na Hulanda Karibense ta entregá e promé Manual di Personal na señora Nilva Wout, direktor ehekutivo di e R.K. Schoolbestuur Boneiru (den presensia di tur direktor di skol di e R.K. Schoolbestuur).
E posishon hurídiko di e personal den enseñansa ta un materia basta kompliká. Entre otro dor ku e kondishonnan laboral ta stipulá den diferente areglo. E manual mes no ta un areglo legal pero e ta duna solamente splikashon tokante e derecho- i obligashonnan manera stipulá den e lei i reglanan. Por ehèmpel tokante e renumerashon, sobresuèldu i tiponan di ferlòf. Un resúmen di areglonan di mas importante ta insertá den e anekso serka e manual. E areglonan aki ta públiko i tur hende por konsultá nan riba Internet (wetten.overheid.nl).
Por download un pdf-vershon di e Manual di Personal for di e wèpsait di RCN/OCW: www.rijksdienstcn.com bou di Enseñansa, Kultura & Siensia/Personal den enseñansa/Manual di personal.
E realisashon di e Manual di Personal ta un di e akshonnan for di e agènda di enseñansa pa Hulanda Karibense pa e añanan 2017 te ku 2020. Den e agènda di enseñansa tin akshonnan pará ku ta dirigí riba mehorashon mas aleu di e kalidat di e enseñansa. Den esei tin atenshon tambe pa un kantidat di kondishon esensial, manera riba e tereno di e kondishonnan laboral.
A realisá e akuerdonan ku ta forma e base pa esaki, den e Op Overeenstemming Gericht Overleg (OOGO) (Deliberashon dirigí pa yega na akuerdo). Esaki ta un konsulta entre direktivanan di skol, sindikatonan i gobièrnu insular.
Hefe di servisio Nolly Oleana di OCW na Hulanda Karibense ta entregá e promé Manual di Personal na presidente di direktiva Anastasia Simmons di e Sacred Heart School na Saba.