Banko Sentral i ENNIA ta pidi rekonosementu hurídiko merikano pa dispone di propiedat di ENNIA na Merka
WILLEMSTAD/PHILIPSBURG – Banko Sentral di Kòrsou i Sint Maarten (CBCS) huntu ku ENNIA Caribe Holding NV i algun di su supsidiarionan (ENNIA), ta pidi rekonosementu hurídiko na Merka pa e areglo di emergensia eksistente na e momentunan aki riba ENNIA. Ku e rekonosementu aki ENNIA lo por dispone muchu mas fásil riba propiedatnan di e kompania na Merka e.o. riba kuenta di ENNIA na e banko merikano Merrill Lynch. Hasiendo esaki ta amplia e posibilidatnan pa konklushon positivo di e restrukturashon di ENNIA. E areglo di emergensia dekretá riba ENNIA lokalmente, no tin outomátikamente un balides obligatorio na Merka. Pa logra e rekonosementu hurídiko di e areglo di emergensia menshoná na Merka mester hasi uso di e asina yamá Chapter 15 di e lei di bankarota merikano. Logrando e rekonosementu hurídiko na Merka ta bira mas fásil pa implementá e pasonan nesesario pa yega na restrukturashon di ENNIA.
Ta bon pa enfatisá ku hasiendo uso di e lei di bankarota merikano no ta nifiká niun momentu so ku ta bai den direkshon di bankarota di ENNIA. Meta di e restrukturashon ta i ta keda pa mehora e solvensia di ENNIA. Ademas, banda di e proseso di buska rekonosementu hurídiko di e areglo di emergensia riba teritorio Merikano, ENNIA lo kontinuá normal ku su aktividatnan manera pago di penshun.
Manera a keda anunsiá na yüli 2018, CBCS ta keda tene komunidat informá riba e progreso di e proseso di restrukturashon, teniendo na kuenta si ku e suministrashon di informashon no mag stroba e proseso di restrukturashon ni difikultá e proseso riba su mes.