Hon. Mr. Eugene Rhuggenaath
Prime Minister of Curacao
Fort Amsterdam
Curacao
July 17, 2018
Tema: Reunionan ku Sekretario-General I Konseho di Seguridat di Nashonan Uni- un traishon historiko di e pueblo Antiano
Su Ekselensia!,
Nos a tuma nota ku su Ekselensia a kondusi reunionan ku e Sekretario-General Sr Antonio Guterres I ku Konseho di Seguridat siman pasa na e Sede di Nashonan Uni na New York, ku lo bai den historia komo un “mancha pretu”, un traishon historiko di nos pueblonan Antiano, pasobra e Hulandesnan nunka a kumpli ku nan akuerdo I Tratado di Nashonan Uni ku nan a firma na 1945, kual nan a promete I kompromete libertat I igualdat pa tur e pueblonan di Reino.
E gobierno Hulandes a orkestra su Ekselensia su mishon pa enganja I burla di mundu, Nashonan Uni, Union Oropeo, Caricom I e pueblonan Karibense I Antiano. E momento aki ta wordu konsidera di mesun peso ku e mentira di mas grandi di Hulandesnan den historia kaminda na 1955 Sr Johan Beyen komo Minister di Relashonan Eksterior aisisti pa e prome Prome Minister di Antias Hulandes Sr Efrain Jonckheer a ganja ku nan tabata representa e pueblonan liber di Antias Hulandes, I a absolve Hulanda su obligashon di raporta I e kita nos for di e lista di Teritorionan-Sin-Propio-Gobernashon, I a traishona nos, e desendientenan di esklavonan I pueblonan kolonisa, ku a hereda I atkeri kompleto derechonan di liberat I igualdat meskos ku e Hulandesnan na Hulanda den Oropa.
E temanan prinsipal ku a wordu deskuti I trata na bo reunion, tabata basa riba e kresiendo menasa di kambio di klima I e posibel konsekuensianan pa nos islanan. Tambe e situashon ku nos besinja Venezuela a wordu kuestiona kaminda e parlamento Hulandes luna pasa a pasa un moshon pa buska sosten di Merka, Gran Bretanja I Fransia pa krea un defensa robusto. E akshon aki nos a raporte na e region Karibense pasobra ta usa nos islanan ABC, komo provokashon pa e region pasifiko di Karibe, ku ta aspira unifikashon I integrashon, direkshon di un posibel konflikto arma: un desater pa Karibe, mas pio ku kambionan di klima I orkanan, pasobra Karibe prinsipalmente ta depende di turismo komo e pila prinispal di ekonomia.
E kurso di eventonan previo ku a kondusi ku e gobierno I representashon permanente di Hulanda o Reino na Nashonan Uni a disidi komo ultimo rekurso pa usa nos mes hendenan, su Ekselensia, un Prome Minister di un gobierno ku e Hulandesnan tin kontrol total riba dje, pa medio di e presupuesto, dor un Komishon di Supervishon Finansiero (CFT) I kontrol total riba e sistema Hudisial, ku ta un berguensa I burla di demokrasia.
Nos preguntanan na su Ekselensia ta ku si e Sekretario General a wordu puntra su punto di bista riba eradikashon di kolonialismo I si ku e miembronan di Komishon di Seguridat nan meta primordial a keda protekshon di derechonan humano I pa defende esnan ku no por defende nan mes kontra abusonan, I, ku nan a wordu informa o a pidi nan opinion riba lo siguiente:
-riba e hecho ku e gobierno Hulandes a chantagia, ekstorna, I deroka e gobierno legitimo di St Maarten despues di e orkan devastador di anja pasa I a forsa un elekshon nobo I lo solamente duna ayudo monetario pa rekonstrukshon si entrega nan outonomia limita, nan demokrasia I kontrol di frontera bek na gobierno Hulandes
– riba e akshon I intervenshon unilateral no-demokratiko di e Hulandesnan na St Eustatius na februari 2018, deroka I destitushon di e gobierno legitimo elegi demokratikamente pa medio di leglisashon I abuso di poder ku polis I militarnan riba stanby den haf, I a apunta un gobernado I gobierno kolonial no-demokratiko pa goberna e pueblo Statiano
-riba e resiente moshon den luna di Mei ku a wordu sostene I pasa pa e mayoria den bo mes parlamento di Korsow kondenando e intervenshon di Hulandesnan na St Eustatius kual su Ekselensia su partido no a sostene I no a demonstra solidaridat I hermandat pa bo mes isla ruman Karibense
-riba e situashon di bo isla hermana Bonaire kaminda e pueblo ta wordu goberna den un status kontra nan deseo I ku nan demokratikamente I legalmente a rechaza I ku e Boneriano a bira un minoria riba nan mes isla den tempu korto despues di imigrashon ilimita I aneksashon illegal di 10 Oktober 2010, I a wordu ankra bao di derechonan no-igual den Konstitushon Hulandes na Oktober 2017 I ta enfrentando un proseso systematiko di limpiesa etniko I wordu displasa, un ruta inevitabel di wordu eradika?
Esakinan ta algun di preguntanan I asuntonan ku nos lo a desea I a spera ku bo lo a trese na atenshon di e komunidat internashonal, Nashonan Uni, na luga di ta un sekuas di e Hulandesnan kontra bo mes un pueblonan pa juda destrui Karibe na mes manera ku bo antesesornan a destrui Antias na 10-10-10. Komo ku silensio pa ku inhustisia ta hasibo komplise ku inhustisia, den bo silensio riba violashon di derechonan fundamental di bo rumanan manera deklara pa Nashonan Uni, su Ekselensia abo ta komplise ku krimen kontra humanidat.
Finalmente, manera nos historia a sinja nos ku e Hulandesnan ta maestro den e wega di dividi-i-goberna, I a institushonalisa kolonialismo I rasismo, I semper a rekompensa te asta dia di awe e traidornan di nan mes pueblo ku ta loyal na e gobierno Hulandes ku kondekorashonan Real I posishonan di poder I plaka, nos a keda solamente ku e speransa ku su Ekselensia lo realisa ku nos uniko salbashon komo pueblo Antiano-Karibense ta pa uni bek ku bo mes un pueblonan I rechaza e ola nobo di re-kolonisashon Hulandes, I nos tin speransa ku su Ekselensia komo un lider, un prome minister, lo respeta, protega I kumpli ku e derechonan di nos, bo rumanan, e pueblo Antiano.
Atentamente,
James Finies, Bonaire
C.c. Sekretario General di Nashonan Uni, Mr . Antonio Manuel de Oliveira Guterres
Miembronan di Konseho di Seguridat di Nashonan Uni
Parlamento I Gobierno di Hulanda
Parlamento di Korsou
Parlamento di Aruba
Parlamento di St Maarten
Caricom
COPPPAL