Na aña 2016 forsa di kompra komun di poblashon na Hulanda Karibense a bolbe krese. Pa poblashon di Saba forsa di kompra a oumentá ku 4,8 porshento. Eesaki ta e oumento di mas grandi. Na Boneiru i Sint Eustatius e oumento tabata respektivamente 1,9 porshento i 2,4 porshento. Forsa di kompra pa famia ku mucha chikitu a mehorá na e tres islanan tambe pa motibu di introdukshon di kompensashon pa yu na 2016. CBS ta informá esaki a base di sifra nobo.
Desde e promé biaha ku a midi na 2012, forsa di kompra a oumentá kada aña na e tres islanan. Ta papia di un oumento di forsa di kompra ora entrada subi mas ku nivel promedio di preis i por kumpra mas produkto i servisio. Na Saba forsa di kompra a krese mas fuerte kada aña, ku eksepshon di aña 2015. E oumento di 4,8 porshento na 2016 tabata esun di mas grandi. Ta trata e asina yamá desaroyo mediano di forsa di kompra: pa esun mitar di poblashon forsa di kompra a subi ku 4,8 porshento òf mas, pa e otro mitar forsa di kompra a krese ku ménos ku 4,8 porshento. Na 2016 forsa di kompra a baha pa 34 porshento di habitante di Saba. Na 2015 Boneiru i Sint Eustatius tabatin un oumento di forsa di kompra ku un punto kulminante di 4,6 porshento.
Oumento di mas grandi serka famia di un mayor ku menor di edat
Debí na introdukshon tambe di kompensashon pa yu, forsa di kompra a drecha na 2016 en partikular pa hende ku ta forma parti di famia ku mucha chikitu. Pa famia ku un mayor i solamente mucha menor di edat , forsa di kompra a oumentá mas tantu: Na Sint Eustatius ku 8%, na Boneiru ku 6,9 porshento i na Saba ku 13,1 porshento. Personanan soltero i partner di un pareha ku no tin yu a entregá respektivamente 0,3 porshento i 0,5 porshento na forsa di kompra.
Grandinan na Sint Eustatius i Saba tambe tin mas forsa di kompra
Tantu na Saba komo na Sint Eustatius forsa di kompra a drecha pa tur kategoria di edat. En partikular miembronan di kas di famia ku tin 60 aña òf mas a mira ku nan forsa di kompra a oumentá, debí na e medidanan tumá na 2016. A oumentá e sumanan (èkstra) pa AOV i tambe a oumentá e kompensashon pa AOV. Di e forma ei hende ku no ta risibí AOV kompletu por haña entrante 2016 AOV adishonal. Nan ta haña esaki a base di Ònderstant. Na Sint Eustatius e grupo di hende di 60 aña òf mas tabatin un oumento di forsa di kompra di 6,9 porshento, i na Saba e kresementu tabata 5,1 porshento. Na Boneiru e sumanan di AOV no a kambia i preisnan a subi, esaki a pone ku e grupo aki a haña su mes konfrontá ku un bahada di forsa di kompra di 0,5 porshento.
Mas forsa di kompra pa trahadó tambe
Forsa di kompra a oumentá pa trahadó na tur e tres islanan. Na Saba e oumento di 3,7 porshento tabata esun di mas grandi. Siguí pa Boneiru i Sint Eustatius ku respektivamente 2,3 i 1,6 porshento. Na Sint Eustatius i Saba forsa di kompra a oumentá tambe pa hende ku ta risibí ayudo sosial di gobièrnu.
Na 2016 yudansa sosial AWW i Ònderstant meskos ku AOV a subi (èkstra) i esei tabatin un efekto ku a pusha forsa di kompra mand’é ariba. Na Sint Eustatius forsa di kompra di hende ku ta haña yudansa finansiero di gobièrnu a subi ku 8,9 porshento i na Saba ku 7,4 porshento. Na Boneiru no a subi yudansa finansiero di gobièrnu. Pa e motibu ei tambe forsa di kompra a baha ku 0,5 porshento.
Oumento di mas grandi di forsa di kompra pa entradanan mas abou
Na 2016 tur grupo di entrada a ripará ku nan forsa di kompra a mehorá. Na Sint Eustatius forsa di kompra a oumentá pa e entradanan mas abou ku 8,0 porshento i na Saba tabata trata un oumento di 6,6 porshento. Pa boneriano e oumento di 2,2 porshento tabata algu mas abou. Pa kasnan di famia ku entrada mas haltu forsa di kompra a drecha en partikular na Saba. Mitar di e grupo aki a konosé un oumento di 3,3 porshento òf mas, miéntras ku 29 porshento a haña nan mes ku un bahada den forsa di kompra.
Fuente:
Hulandes: http://statline.cbs.nl/StatWeb/publication/?DM=SLNL&PA=83551ned
Ingles: http://statline.cbs.nl/StatWeb/publication/?DM=SLEN&lA=EN&PA=83551eng
Página ku aklarashon :
Desaroyo di forsa di kompra
Desaroyo di forsa di kompra di un persona, kalkulá pa e kambio koregí, di kambio di preis di e entrada standarisá ku por usa pa kasnan di famia. Forsa di kompra (dinámiko) por kambia pa diferente motibu. E entrada ta kambia por ehèmpel debí na un oumento general òf periódiko di salario, promoshon, tumamentu di (otro) trabou i baimentu ku penshun. Kambionan den formashon di kas di famia (un yu ta bai for di kas, parehanan no ta ku otro mas, etcetera) ta kondusí tambe den kambio di entrada. Den desaroyo dinámiko di forsa di kompra a deskontá tur e kambionan aki.
Introdukshon kompensashon pa yu
Na Hulanda Karibense a remplasá suma adishonal pa yu na 2016 pa kompensashon pa yu. Kada kas di famia ku mucha menor di edat por pidi entrante di yanüari 2016 pa kada yu un suma fiho pa luna na Rijksdienst Caribisch Nederland. Promé ku esei, tabata deskontá e suma adishonal pa yu den forma di dedukshon fiskal riba entrada ku mester paga impuesto riba dje (un suma fiho pa yu ku un máksimo di dos yu). Por a hasi uso di esei basta e entrada tabata riba e entrada ku ta permití pa risibí sin ku mester paga impuesto riba dje.
E desbentaha di esaki tabata ku e ora ei kas di famia ku un entrada bou di e suma ku ta permití pa haña komo entrada sin ku mester paga impuesto pa esei, no tabata òf kasi no tabata bini na remarke. Ku introdukshon di kompensashon pa yu a legumai e kondishon di dependensia di entrada i awor tur kas di famia ku yu ku ta menor di edat ta haña un suma fiho pa luna.
Oumento èkstra di yudansa sosial
Pa mehorá seguridat di eksistensia i kombatí pobresa, ta indeksá tur aña suèldu mínimo legal i yudansa sosial (AOV i Ònderstant) na Hulanda Karibense a base di sifra di indeksashon di preis pa konsumidó (di e di tres kuartal promé ku e aña kaminda tin e oumento) di CBS. Den algun kuartal di 2015 tabatin deflashon na Boneiru, Sint Eustatius i Saba. Sinembargo a oumentá suèldu mínimo legal i yudansa sosial èkstra na 2016. Di e forma ei Boneiru a resultá nèto ku sumanan ku no a kambia pa suèldu mínimo legal i yudansa sosial miéntras ku na Saba i Sint Eustatius nan a subi nèto ku respektivamente 3,5 i 6,1 porshento.
AOV adishonal a base di ònderstant
Desde promé di yanüari 2016 Reglanan di Maneho Dekreto ònderstant BES a kambia. A inkorporá den esaki entre otro ku hende ku tin derecho riba AOV i ku no ta risibí e suma kompleto di AOV, ta bini na remarke pa un kompensashon finansiero. Esnan konserní mester kumpli sí ku tur kondishonnan pa Ònderstant. Esei ta nifiká ku ta controlá entrada i propiedat segun kondishonnan pa Dekreto ònderstant BES.
Kompensashon AOV
Na 2016 a adaptá e sumanan pa kompensashon di AOV a base di investigashon nobo di diferensianan den nivel di preis entre e islanan. Pa 2016 a fiha e sumanan pa e kompensashon aki na Sint Eustatius i Saba respektivamente na 2 porshento i 8 porshento di e suma di AOV na Boneiru. Ora a midi di nobo na 2015 nivel di preis na Sint Eustatius tabata 7 porshento mas haltu ku na Boneiru. E suma pa kompensashon a subi ku esaki di 13 dòler na 2015 pa 41 dòler na 2016. Na Saba nivel di preis tabata asta 10 porshento mas haltu. Ku esei e suma pa kompensashon a subi di 51 dòler na 2015 pa 59 dòler na 2016.
Grupo di entrada
A kalkulá pa persona e promedio di e entrada standardisá korespondiente ku tin pa usa pa kasnan di famia na 2015 i 2016.E repartishon aki di entrada di grupo di ‘kwartiel’ ta basá riba e promedionan aki pa aña 2015 i 2016. Di e forma ei ta koregí pa regreshon na e promedio.