Karta na Rei Willem Alexander 4 juli 2018

Na: Su Mahestat Rei Willem Alexander, Bonaire, 4 juli 2018

Su Mahestat,

Ami ta skirbi e karta aki komo follow-up riba mi kartanan anterior na Su Mahestat riba 9 juni 2017 I 22 Oktober 2017 ku preguntanan basa riba nos enkuentro personal di 16 September 2013 na Bonaire I bo promesa na ami I e pueblo di Bonaire I preguntanan riba e violashon di e Tratado di Nashonan Uni pa Reino Hulandes ku bo Kabinete, den kartanan di 5 Juli I 25 Juli, 2017 solamente a promete pa kontesta pasobra mester di tempu pa formula kontestanan, pero te ku awe ningun kontesta riba e preguntanan a wordu risibi.

Riba 1 juli, 2018 nos na Bonaire a nota ku Su Mahestat a baha na nos isla ruman Korsow, un pais outonomo den Reino pa un bishita ofisial en konekshon ku selebrashon di outonomia I bandera di Korsow riba 2 juli.

Ironikamente, 1 Juli ta pa nos e dia di mas importante di nos historia den konmemorashon I selebrashon di 1 Juli 1863. Solamente 155 anja pasa nos ansestornan a wordu duna pa Su Mahestat su gobiernu ofisialmente e status di hende. E momento ku nos a wordu rekonose atrobe komo sernan humano, despues di a wordu sekuestra I ranka for di nos raisnan I tera I kas ansestral, di nos kultura, religion, manera di biba, Su Mahestat su gobiernu a disidi ku nos no ta mas un obheto o poseshon di un donjo I tabata liber atrobe pa start nos emansipashon I start konstrui nos nashon. Nos tabata e ultimonan pa a wordu libera I pa nos humanidat wordu rekonose. Kasi un siglo, 100 anja despues ku otronan den islanan Karibense tabata liber kaba.

Ami sa ku sigur Su Mahestat ta bon na altura di nos historia komun I tambe ku e mayoria di nos pueblo no ta na altura pasobra nos nunka a wordu eduka tokante e parti oskuro aki di historia di Reino pero a wordu sinja pa respeta Su Mahestat I manera nos a mustra Su Mahestat e respet aki tur momento apesar di krueldat inhumano komete pa e Hulandesnan na nos bisa-welonan, nos famianan, nos ansestornan.

Ami ta dirigi esaki na Su Mahestat pasobra nos pueblo a mustra respeto profundo pa Su Mahestat komo nos Rei
I Hefe di Estado I pasobra Su Mahestat a mustra di tin konsenshi I sintimentu pa nos. Kisas ta motibu di berguensa ku Su Mahestat no a wak nos direkshon di duna un tiki sosten na nos,Bonaire, ora ku Su Mahestat a bishita nos isla ruman Korsow kaminda nan ta mes humano ku nos, pero lo kontario tin nan mes gobernashon I un grado di outonomia, I kisas ta pasobra bo Gobiernu a disidi na Oktober 2017 sin kompashon pa aneksa I ankra nos huntu ku Sint Eustatius den konstitushon Hulandes sin derecho igual I kontra di deseo di e pueblo manera ekspresa demokratikamente I legalmente pa medio di referenduman di 2010, 2014 I 2015.

Nos ta spera ku abo komo nos Rei, ku nos ta respeta altamente, lo tuma responsabilidat pa hasi tur loke ta den bo poder pa dirigi na bo gobierno pa kontesta e kartanan ariba menshona I debolbe nos bek nos derecho di emansipashon I konstrui nos mes nashonan, nos outonomia I grado di propio-gobernashon na nos pueblo manera abo a promete na ami riba 16 September, 2013, konfirma den karta di bo Kabinete 8 januari 2014. I manera bo bisa-wela Reina Wilhelmiina, a promete I Reino a firma riba 26 Juni 1945 den Nashonan Uni I e Lei di Reino di 1 juli 1863, pa kual nos tur mester ta mesun humano I mesun liber den Reino.