Di 16 te ku 26 di aprel, Inspekshon di patrimonio a bishitá Boneiru, Saba i Sint Eustatius. E Inspekshon akí ta kontrolá maneho di informashon i di archivo di tantu Hulanda Oropeo komo Hulanda Karibense. Meta di e bishita na Hulanda Karibense tabata pa inventarisá kalidat di maneho di informashon. I naturalmente pa sera konosí ku e instansianan ku tin maneho di informashon i di archivo na nan enkargo.
Informashon di gobièrnu ta importante. Bon maneho di e informashon akí ta pone ku gobièrnu por duna kuenta i rason. Pero e ta kontribuí tambe na un funshonamentu efektivo i efisiente di kada sekshon gubernamental. Ademas archivonan di gobièrnu ta forma parti di e patrimonio kultural.
Lei di archivo Bes i e Desishon di Archivo BES (2010) ta konta tambe pa e entidatnan públiko na Hulanda Karibense. Inspekshon di patrimonio a studia durante e bishita na Hulanda Karibense kon e instansianan lokal ku ta manehá archivo ta funshoná. I kiko nan tin mester pa por kumpli ku e eksigensianan ku e Lei di archivo akí ta imponé na maneho di archivo.
Inspekshon ta kontrolá si instansianan di gobièrnu hulandes ku ta manehá archivo ta kumpli ku Lei di archivo 1995. Na Hulanda Karibense esakinan ta por ehèmpel Servisio di Impuesto i Ofisina di Seguro di Kuido. Inspekshon di patrimonio a bishitá e instansianan aki tambe na Hulanda Karibense. Aki tambe e meta tabata pa haña un bista di e moda di traha. I kiko eventualmente mester ainda pa por kumpli ku e eksigensianan di Lei di archivo 1995.
Inspekshon di patrimonio ta un supervisor independiente bou di responsabilidat di minister di Enseñansa, Kultura i Siensia (OCW). Inspekshon di patrimonio kier yega na un bon maneho kualitativo i mantenshon pa loke ta trata informashon di gobièrnu i patrimonio kultural. E meta final ta pa tur informashon for di archivonan di gobièrnu keda disponibel i aksesibel di un manera permanente.