Na Minister di Relashonan di Reino, Sra. Kajsa Ollongren,
Bonaire, 20 maart 2018
Topiko: Obheshon kontra yamada pa referendum riba diarason 21 maart 2018
Apresiabel Minister,
Abo ta hasi un yamada riba e pueblo di Bonaire( I Sint Eustatius) pa medio di un pas-di-votashon pa riba diarason 21 mart pa vota den un referendum konsultativo riba e Ley di servisonan Inteligensia- I Seguridat 2017.
Na prome lugar pa medio di esaki ami kier hasi un apelashon amikal na abo, komo e minister nobo di Relashonan di Reino, pa tuma nota di mi varios kartanan anterior, kaminda mi pone na atenshon di boso gobiernu I parlemento riba boso direkshon diktatorial, e aneksashon I ankramentu unilateral den boso Grondwet e status ilegal di Entidat Publiko di Bonaire I Sint Eustatius, I ku esaki ta e pugna di tratadonan I ley internashonal ku boso mes a akorda. Bo Sektretario di Estado, Sr Knops resientemente durante su bishita na Bonaire, a deklara publikamente na ami, ku e no sa nada di nos pasado kolonial komun I di tratadonan I derecho humano. E illegalidat aki ta parse ku no ta interesa e tampoko, mirando su blunder internashonal na Sint Eustatius, ofisialisa door di boso Kabinete I parlamento, boso aparentemente-legal intervenshon no-demokratiko kolonial, imponiendo un gobernashon kolonial. Hipokresia na nivel di mas haltu, kaminda Hulanda ta ko-fundador di Nashonan Uni, ta profila su mes internashonalmente komo un nashon filantropiko, a asta, a logra hinka su mes den konseho di seguridat di Nashonan Uni, I di otro banda ta violando derechonan humano di nan mes partnernan-den-Reino.
E pueblonan di Bonaire riba 18 december 2015 I Sint Eustatius riba 17 december 2014 respektivamente pa medio di un referendum a rechaza e status illegal aki I nos propio, legitimo I demokratikamente eskohe respresentantenan di nos pueblo, a ratifika e resultadonan komo un desishon legal demokratiko. Boso gobiernu ta ignorando nos referedum, e bos di nos pueblo I ta forsando I gobernando nos pueblonan den un status ku formalmente I legalmente a wordu rechaza I ta imponiendo esaki pa medio di boso poder ekonimiko, militar I polisial. Esaki ta no-demokratiko I funesto pa e libertatnan fundamental inherente di nos pueblo di gobernashon-propio.
Awor bo ta di plan komo minister nobo pa sigui konstrui riba e illegalidat aki, e moeras di maldat kontra nos pueblo I humanidat, pa sigui konstrui pa medio di viola otro un fundeshi di demokrasia I estado di derecho; e derecho humano sagrado; pa respeta su bida priva, su bida familiar, su habitashon I korespondensia. Abo lo mester sa ku e derecho aki ta prohibi bo eksplisitamente pa involvi ku kualke outoridat publiko, pues pa laga nos komo suidadonan ta liber den realishon di nos derecho. Bo pregunta I referendum pa e motibu aki di antemano ta illegal pasobra derechonan humano prominente ta sagrado I asta ku permiso (bo referendum illegal) ta keda un violashon di nos derechonan humano.
Awor nos ta komprende I bolbe sinti e dolor I sufrimentu di nos antepasadonan, kon boso parlamento tabata konspira I traha leynan inhumano kontra nan, boso ‘kapersbrieven’ legal, boso akshonan militair legal kontra nos antepasadonan, segun boso ley deklara komo no-humano, komo merkansia, boso trafikashon di hende malbado. Asina simpel esaki ta parse pa boso gobiernu, tur segun boso leynan, na boso honor I konsenshi, e in-humanidat.
Al final mi ta firma obheshon kontra bo intento illegal, bo referendum illegal pa legalisa illegalidat, ku of sin permiso di mi I tur e otro suidadonan di Bonaire I Sint Eustatius, ku e derechonan aki ta pertenese, ku e derechonan humano aki ta keda sagrado.
Atentamente,
James Finies, suidadano di Bonaire