Den e di tres kuartal di 2017 e preisnan di konsumidó tabata 2,1 porshento mas haltu na Sint Eustatius ku un aña anterior. Na Boneiru e subida di preis tabata 0,6 porshento. Na Saba konsumidónan a paga den e di tres kuartal hustamente 1,3 porshento ménos pa merkansia i servisio ku den e di tres kuartal di 2016. Asina CBS ta duna di konosé.
Preisnan di konsumidó 0,6 porshento mas haltu na Boneiru
Na Boneiru kasnan di famia a paga e último kuartal 0,6 porshento mas pa merkansia i servisio ku un aña anterior. Den e di dos kuartal esaki ainda tabata 0,4 porshento. Partikularmente artíkulo- i aparatonan doméstiko, manera kortina, paña di kama i frishidèr, a bira mas karu.
Preis di koriente a baha na Sint Eustatius, a subi na Saba
Na Sint Eustatius i Saba Outoridat di Konsumidó i Merkado (ACM -Autoriteit Consument en Markt) a stipulá entrante 1 di yüli 2017 tarifanan maksimal pa koriente. Pa e motibu akí konsumidónan na Sint Eustatius a paga un promedio di 5 porshento ménos pa koriente den e di tres kuartal ku un aña anterior. Na Saba e tarifanan nobo a resultá ménos faborabel: e preis promedio di koriente pa konsumidó a subi ku mas di 10 porshento kompará ku un aña anterior.
Entre otro pa motibu di koriente mas barata e preisnan di konsumidó na Sint Eustatius a subi ménos fuerte ku den e di dos kuartal. Den e di tres kuartal e preisnan a subi ku 2,1 porshento, den e di dos kuartal esei tabata ainda 2,6 porshento. Aparte di koriente, awa di kranchi tambe a bira mas barata. Di otro banda, e preisnan di alimento a hustamente subi.
Na Saba e preisnan pa konsumidó den e di tres kuartal ta 1,3 porshento mas abou ku un aña anterior. Kuartal pasá e preisnan tabata 1,0 porshento mas abou. No opstante koriente mas karu e nivel di preis promedio pues a sigui baha mas. Esaki ta partikularmente pa motibu di e desaroyo di preis di artíkulonan di baño i servisio di telefòn.
E sifranan di Sint Eustatius i Saba te ku awor no ta duna un bista konkreto di posibel efektonan di preis okashoná pa orkan Irma. A hasi opservashon di preisnan partikularmente promé ku Irma, den yüli i ougùstùs. Despues di Irma, den sèptèmber a logra hasi ménos opservashon di preis di lokual ta e kustumber, pa motibu ku hopi artíkulo no tabata disponibel.
Sifranan tentativo
E sifranan pa e di tres kuartal di 2017 ta tentativo i ta ser stipulá definitivo na momentu di publikashon tokante e di kuater kuartal di 2017.
Fuente: StatLine: Hulanda Karibense http://statline.cbs.nl/Statweb/publication/?DM=SLNL&PA=81122NED&D1=0-2&D2=0&D3=a&D4=a&VW=T
Lenknan relatá:
• Consumentenprijsindex Bonaire vanaf 1973