9 di aprel 2026 – Entrante e luna akí, habitantenan di Hulanda Karibense ku por a
eksperensiá diskriminashon por entregá un keho ofisialmente na e Instituto Nashonal pa
Derecho Humano. Esaki ta un paso importante den e lansamentu di e Lei di Protekshon
kontra Diskriminashon pa Boneiru, Sint Eustatius, i Saba, ku a drenta na vigor dia 1 di
yanüari 2026. Por entregá un keho di diskriminashon fásil riba e wèpsait nobo di e Instituto
Nashonal pa Derecho Humano. Personal di e Instituto lo ta riba tur tres isla di 2 di april te ku
10 di april pa papia ku habitantenan tokante diskriminashon, nan derechonan, i e pasonan ku
nan por tuma.
Gerald Simmons-de Jong (Miembro Suplente, Instituto), Jacqueline Evers-Maria (empleado, Gemeenschappelijk Hof van Justitie), Augustina Wamulume (manager asistente di huisio, Instituto), Gerben Drenth (hues, Gemeenschappelijk Hof van Justitie) i Moramay Koomen (konsehero hurídiko Hulanda Karibense, Instituto) riba Sint Eustatius.
Mediashon òf un desishon
Habitantenan ku ta kere ku nan a wòrdu tratá desigual, por ehèmpel na trabou, na skol, òf
ora di ofresé produkto i servisio, awor por entregá un keho na e Instituto. Esaki por enserá
diskriminashon basá riba entre otro orígen, genero, edat òf desabilidat di un persona. E
Instituto por evalua ofisialmente si diskriminashon a tuma luga. Òf e por yuda ku mediashon
si esei ta mas adekuá.
Kolaborashon ku Legal Desk i Lokèt Hurídiko
Mas lat den e aña akí lo lanta un Legal Desk na Sint Eustatius i Saba, i un Lokèt Hurídiko na
Boneiru. Habitantenan ku por a wòrdu diskriminá tambe por bai aki. E Lokèt ta skucha nan
historia, duna konseho, i wak pa posibel siguiente pasonan. Komo un siguiente paso, nan
por yuda tambe entregá un keho di diskriminashon na e Instituto. Habitantenan tambe por
aserká e Lokèt ku otro pregunta hurídiko, manera konflikto ku un dunadó di trabou, problema
ku hür, òf asuntu di famia.
Lansamentu di formulario di keho, wèpsait, i Facebook
E formulario pa entrega keho di diskriminashon ta disponibel na hulandes, ingles i
papiamentu. Tambe ta wòrdu traha riba un vershon na spañó.
Pa pregunta òf yudansa pa yena e formulario, habitantenan por tuma kontakto ku nos den
tur kuater idioma via WhatsApp na +31 6 25182759. E konsehero hurídiko di e Instituto ta
kontestá pregunta riba djamars di 12:00 pa 14:00 (ora di Karibe) i riba djaweps di 07:00 pa
9:00 (ora di Karibe).
Banda di e wèpsait nobo na hulandes, ingles, i papiamentu, www.humanrightsincn.nl, e
Instituto tambe a lansa un página di Facebook pa Hulanda Karibense:
www.facebook.com/humanrightsincn. Riba tur dos plataforma, derechonan humano
importante pa Hulanda Karibense, trato (des)igual, i e tareanan di e Instituto ta wòrdu diskutí
den mas detaye.