Willemstad/Philipsburg – Un di e metanan di Centrale Bank van Curaçao en Sint Maarten (CBCS)
den su papel di supervisor di sektor finansiero pa Pais Kòrsou i Pais Sint Maarten ta di fomentá un
sistema di pago sigur i efisiente, pero tambe pagabel, konfiabel i aksesibel. Durante e aña ku a pasa,
CBCS i Curaçao Bankers Association (CBA) a deliberá riba e posibilidat pa tur hende por disponé
di a lo ménos un kuenta di pago. Den konsulta estrecho, CBCS i CBA a yega na algun akuerdo
adishonal pa fomentá inklushon finansiero.
Debí na e digitalisashon rápido ku komunidat ta pasando aden, un kuenta di banko propio a bira
algu indispensabel pa por partisipá den bida sosial. Uso di plaka kèsh pa kompra di produkto i pago
di impuesto i faktura di koriente ta birando kada bes ménos fásil. Aki i aya, tabata usa chèk di banko
ainda pa paga salario i faktura, pero den mayoria di kaso, e bankonan a stòp di ofresé e opshon
akí.
Den e kòmbersashonnan ku a tuma lugá, na tur momento sektor bankario a indiká ku nan ta bon
konsiente di nan responsabilidat ku komunidat. E bankonan a enfatisá ku nan tin vários aña kaba
ta traha pa ofresé persona natural un kuenta di pago. No opstante, CBCS i e bankonan ta konstatá
ku ainda tin pregunta pendiente tokante kuantu ta dura pa por habri un kuenta asina i ki dokumento
tin mester, i tokante akseso na produkto di pago.
En prinsipio, e bankonan ta ofresé un pakete di servisio di pago básiko na tur persona mayor di
edat, basta ku nan ta residente legal i tin residensia òf lugá di biba fiho na Kòrsou òf Sint Maarten,
i ku nan identidat por ser komprobá òf verifiká konforme Landsverordening Identificatie bij
Dienstverlening, respektivamente konforme Landsverordening bestrijding witwassen en
terrorismefinanciering.
E pakete di servisio di pago básiko ta inkluí en todo kaso e posibilidat di hasi internet banking, usa
un app pa mobile banking i risibí un tarheta ku ta duna akseso na e kuenta di pago. Pa solisitá e
pakete di servisio di pago básiko, tin ku kompletá un prosedimentu simpel di solisitut i screening
di kliente. Riba e formulario di solisitut, mester suministrá e siguiente informashon:
- Nòmber i fam
- Sekso
- Numbernan di telefòn
- Fecha di nasementu
- Nashonalidat
- Identifikashon bálido (pasport, sédula, reibeweis, dokumento di pèrmit di estadia)
- Adrès (nòmber di kaya i number di kas)
- Adrès di e-mail
- Profil di transakshon, inkluso fuente di entrada
- Kualke enbolbimentu den froude òf delito
Ademas, e solisitante mester duna e banko komersial e siguiente dos dokumentonan: - Dokumento di identifikashon bálido
- Komprobante di adrès
Si e banko komersial risibí e informashon i dokumentonan akí na òrdu, e banko lo habri e kuenta
di pago denter di 10 dia di trabou. E bankonan lo ofresé e kuentanan di pago sin fiha komo
kondishon ku e persona mester tuma servisio di banko adishonal.
Un banko komersial tin mag di nenga un petishon debí ku e solisitante tin antesedente negativo,
por ehèmpel, si ta konosí pa e banko ku e solisitante ta òf tabata enbolbí den estafa, abusu di
konfiansa, un delito, falsifikashon di dokumento, labamentu di plaka i/òf froude. E banko komersial
mester informá e solisitante, denter di 10 dia di trabou, ku a nenga su petishon.
Den kaso ku tin sirkunstansia grave enbolbí, por ehèmpel, si e titular di kuenta a hasi mal uso di su
kuenta di pago, karchi di pago i/òf akseso na internet banking, e banko komersial por blòkia
esakinan inmediatamente pa tur tipo di uso.
E bankonan ta reservá e derecho di revoká e kuenta di pago den kaso ku e titular di kuenta keda
sin kumpli ku e obligashonnan mará na e kuenta di pago. E banko komersial lo kumpli ku e plaso
di aviso fihá den e kondishonnan general di kada banko en kuestion, a ménos ku debí na sierto
echo òf sirkunstansia, no ta rasonabel pa spera pa e banko komersial kumpli ku esei. Den kaso ku
e titular di kuenta a aktua intenshonalmente òf a kometé negligensia grave, e plaso di aviso no ta
konta. Den tur dos kaso, e banko komersial lo informá e titular di kuenta na tempu tokante su
desishon.