Un gran paso finansiero pa habitante di Hulanda Karibense


Vários departamento a uni forsa pa sigui sostené Boneiru, Saba i Sint Eustatius. E invershon tin komo meta pa duna un impulso adishonal na mehorashon di e nivel di bida di e habitantenan di Hulanda Karibense. Ademas, e ‘vrije uitkering’ di e entidatnan públiko ta oumentá konsiderablemente. Entrante 2023 gabinete strukturalmente ta invertí 30 mion adishonal den Boneiru, Saba i Sint Eustatius. Banda di esaki tambe e departamentonan mes lo kontribuí pa kombatí pobresa. E suma aki ta oumentá kada aña te ku 12 mion euro struktural den 2025.
E invershonnan adishonal aki ta hopi nesesario. Pobresa i nivel di bida durante dies aña ta e problema prinsipal na Hulanda Karibense. Un orkan, inflashon i un pandemia a sòru pa kosto di bida diario a bira mas karu. Den 2022 lo bini adishonalmente 23 mion i entrante 2023 e montante aki ta sigui oumentá te ku 30 mion strukturalmente. Ku e invershon aki gabinete ta kumpli ku e promesa di invershon struktural, manera stipulá den e akuerdo di gobernashon.
Sekretario di Estado Van Huffelen: “Bida na Hulanda Karibense ta karu. Gastu pa awa di bebe, koriente, telekomunikashon i bibienda ta haltu. Pa hopi hende ta difísil pa yega fin di luna. Ku e invershon aki nos por sòru pa na promé instante entrada i benefisio ta mas haltu i gastu di luna mas abou. Esaki ta nifiká konkretamente ku por ehèmpel por oumentá benefisio i salario mínimo pero tambe redusí gastu di bida, manera awa pa bebe i gastu di energia. Huntu ku gabinete, mi ta sigui hasi esfuerso pa sòru pa e bida diario bira mas pagabel. Ademas, den konsulta ku e islanan nos ta hasi palabrashon tokante di por ehèmpel naturalesa, klima i turismo.”
Konkreto esaki ta trata di e siguiente medidanan:

  • E salario mínimo legal i e benefisionan ta oumentá anualmente entrante 2023, na moda ku na 2025 e salario mínimo legal ta na e mínimo sosial (+28% na Boneiru, +18% na Sint Eustatius i +23% na Saba)
  • Ademas, e montante di un soltero den ònderstant ku ta biba independiente riba su mes ta oumentá paso pa paso di 55% pa 70% den 2025;
  • E montante di kompensashon pa yu ta oumentá entrante promé di yüli 2022 ku $10 i entrante promé di yanüari 2023 ku adishonalmente $10 pa luna pa kada yu.
  • Ta bai introdusí un areglo di desempleo na Hulanda Karibense;
  • Ta bini ku supsidio struktural pa awa di bebe;
  • Ta bai tin rekurso disponibel pa bibienda sosial, loke ta permití aselerá konstrukshon di 204 bibienda sosial pa hür na Boneiru, i por renobá un promé ‘tranche’ di 10 bibienda na Sint Eustatius;
  • Introdusí entre otro un presupuesto pa programa di formashon i desaroyo i tambe formashon adishonal i kontinuo pa fortalesé intermediashon laboral;
  • Introdusí entre otro un fondo di stazje pa fortalesé kolaborashon regional duradero den edukashon vokashonal i pa fortalesé kolaborashon ku Kòrsou i Sint Maarten pa loke ta trata e kursonan den sektor di turismo;
  • Reforsá rekurso di e propio entidatnan públiko di manera signifikante, spesialmente pa e ‘vrije uitkering’. Entrante 2025 e gobièrnunan strukturalmente ta risibí 13 mion Euro mas pa tareanan insular. Ademas tin 10 mion Euro disponibel pa retraso insidental.
    Den anekso 1 por mira detaye eksakto di e montantenan.
  • Den 2022 tin un total di 23 mion Euro disponibel i entrante 2023 strukturalmente 30 mion Euro.
  • Tokante di realisashon eksakto ta bai tin konsulta atministrativo.
  • E relato anual 2021 di Relashonnan den Reino ta mustra ku den 2021 departamentonan a invertí un total di 557 mion Euro na benefisio di Hulanda Karibense.