Sektor di buseo, konstrukshon i hóreka ta sigui papia tokante seguridat propio

rcn.jpg

Na Hulanda Karibense, entrante promé di yüli 2019, a drenta na vigor un desishon tokante seguridat di labor (‘Arbeidsveiligheidsbesluit IV Caribisch Nederland’). Den e desishon aki, entre otro ta stipulá reglanan pa labor di buseo, trabou ku asbèst i esfuerso físiko.
Tantu dunadó di trabou komo empleado tin interes den un lugá di trabou seif i saludabel, i konhuntamente ta responsabel pa esaki. Dunadónan di trabou ta duna instrukshonnan kla, ta krea un ambiente di trabou sigur, i ta sigurá sufisiente deskanso. Empleadonan ta traha segun instrukshonnan risibí, i ta tuma responsabilidat pa salú i seguridat di nan mes i di koleganan. Inspekshon di Labor ta supervisá kumplimentu ku lei i reglamentu relashoná ku trabou saludabel i sigur.
E desishon ta ofresé dunadó di trabou i empleado hopi espasio pa nan mes duna kontenido na e regulashon- i medidanan di seguridat ku tin di aber ku esaki. Na e momentunan aki dunadónan di trabou, ku ayudo di guianan di proseso ku eksperensia, ta trahando katálogonan di salú i seguridat pa diferente sektor.
Dunadónan di trabou den sektor di buseo, di konstrukshon i di hóreka, ta invitá pa asistí na reunionnan spesífikamente pa nan sektor. Propósito di esaki ta pa nan mes establesé e medidanan i reglanan denter di e standardnan establesé pa lei.
E promé dos reunionnan na Boneiru a tuma lugá na komienso di sèptèmber último. Tambe a inisiá resientemente un terser serie di reunion pa e dos sektornan menshoná anteriormente. Aki ta saminá si e riesgo- i medidanan mas importante ta inkluí den e konsepto di e dokumentonan. Despues e dunadónan di trabou un bes mas lo papia tokante ehèmpelnan di trabou komo input pa determiná prosedura i protokòl definitivo di e trabou. Di e manera aki, e dokumento final ta bira mas útil i aplikabel posibel.
Djabièrnè 27 di sèptèmber último, un reunion di sektor di buseo a tuma lugá na Boneiru. Pa sektor di hóreka i di konstrukshon na Boneiru, e siguiente reunionnan ta tuma lugá riba djárason 9 i djaweps 10 di òktober respektivamente.
E luna aki ta kuminsá tambe ku e promé seshonnan pa e sektornan menshoná, na Isla Riba. Na St. Eustatius e enkuentro pa sektor di buseo ta tuma lugá riba djárason 16 di òktober i pa sektornan di konstrukshon i hóreka, riba djaweps 17 di òktober. Pa Saba e fecha pa e reunion di tur e tres sektornan, ta djabièrnè 18 di òktober.
Pa mas informashon tokante orario i sitio i tambe pa apliká, por manda un e-mail pa infobes@medwork.aw òf por yama +599-717-1820.

Leave a Reply

Your email address will not be published. Required fields are marked *

scroll to top