Aruba, Kòrsou, Hulanda i Sint Maarten ta intensivá koperashon pa un mihó salubridat públiko na e parti Karibeño di Reino

E kuater mandatarionan di salubridat públiko den Reino a reuní awe na Boneiru pa e di tres enkuentro reunion ehekutivo pa sigui mehorá i profeshonalisá e kalidat di salubridat públiko. Minister Oduber (Aruba), minister Camelia-Römer (Kòrsou), sekretario di estado Blokhuis (Hulanda) i minister Lee (Sint Maarten) a palabrá ku nan lo intensivá nan koperashon. Gruponan di trabou ta bini huntu mas biaha pa traha riba palabrashon riba entre otro programanan di prevenshon, koperashon entre hospitalnan, remedi, estudio pa profeshonalnan den kuido i pa interkambio di informashon
Mas koperashon entre hospitalnan
Pa loke ta trata e posibilidat pa kuido spesialisá na hospitalnan e paisnan ke traha mas huntu. Pa asina yega na mas tantu posibel kuido adekuá pa personanan den Reino ku ta pone ku pashèntnan mester bai ménos den eksterior pa haña kuido médiko. Esaki ta rekerí pa hasi eskoho den tipo di spesialistanan na kada hospital.

Entrenamentu pa krísis
Pa ta mihó prepará pa situashonnan di krísis manera orkan Irma e kuater paisnan a lanta un grupo di trabou pa yuda e organisashonnan di kuido médiko pa asina víktimanan por haña akohida optimal i pa nan haña kuido médiko di kalidat, pa sòru pa pashèntnan eksistente i gruponan di riesgo no ta na peliger i tin sufisiente remedi na momentu di un krisis. A traha tambe un buki di guia pa momentu di krisis. Resientemente tabatin un entrenamentu kaminda mester a evakuá pashèntnan. E entrenamentu aki a bai bon i a resultá den algun punto di mehorashon, por ehèmpel riba tereno di komunikashon entre e diferente gruponan enbolbí. Pa medio di esaki a pone un fundeshi sólido pa bon koperashon. Bou di guia Sint Maarten ta bai prosesá e puntonan di akshon i lo implementá esakinan.

Atenshon pa prevenshon i mehorashon di estilo di bida.
Prevenshon i estilo di bida te ku awor no tabata pará riba e agènda ku e kuater paisnan tin huntu. A palabrá ku e tópiko aki lo bini bek di forma prominente riba e agènda di e siguiente reunion. Banda di esei Aruba i Hulanda lo eksplorá e posibilidat pa traha mas huntu riba tereno di salú hubenil, kuido sosial i emoshonal, kuido pa adikshon, maltrato di mucha i kuido pa personanan ku limitashon.
Na Boneiru i Sint Eustatius Hulanda a firma un akuerdo di prevenshon i deporte kaminda tin akshonnan konkreto pa un Hulanda Karibense mas salú. Asina por ehèmpel muchanan ku mester di esaki lo haña almuerso salú na skol i na akohida despues di skol. Tambe tin hopi atenshon pa moveshon pa mucha i grandi. Mehorashon di salú seksual tambe ta un parti importante. Kòrsou na e momentunan aki ta traha riba e problema di mamanan hóben ku tin problema pa kuida nan yunan.

Mas profeshonal den kuido na trabou
E kuater paisnan lo bai traha huntu riba e eksigensianan di kalidat pa laga profeshonalnan den kuido establesé na e diferente partinan den Reino Hulandes. Esaki mester kondusí na por ehèmpel hasi mas fásil pa hendenan traha den e ramo aki den e vários paisnan. Pero tin diferensia spesífiko tambe pa loke ta trata e merkado laboral na kada pais. Pa esei kada pais lo bai tuma vários akshon pa sigui profeshonalisá kuido. Asina Aruba ta traha riba rekonosementu i registrashon di diplomanan ku optené den eksterior. Tambe Aruba ta trahando riba un instituto di kalidat ku lo bai evaluá spesialistanan ekstranhero. Sint Maarten ta traha riba un proposishon pa mas sosten di CIBG pa evaluashon di diplomanan di estranheronan. Kòrsou ta den kombersashon ku Universitair Medisch Centrum Groningen pa asina médikonan general sigui nan edukashon pa speshalisá na Groningen.