Sekretario di Estado Knops ta deklara di no ta respeta Karta di Nashonan Uni i derechonan sagrado di outodeterminashon di islanan BES

Na: Sekretario di Estado: Sr Raymond Knops

Bonaire,14 Mei 2019

Topiko: outonomia o propio-gobernashon no ta un eskoho- ta e derecho mas fundamenatl I sagrado di e pueblo

Honorabel Sr Knops,

Nos a tuma nota di bo resiente komunikashonan via prensa I media ku bo no ta mira e islanan BES, Bonaire , Saba I Sint Eustatius den futuro ku outonomia o propio-gobernashon. Motibu ku bo a duna ta pasobra nan ta muchu chikitu. Ami lo ke rekorda bo ku Bonaire ta un nashon I di akuerdo ku resolushon 1514(XV) di Asamblea General di Nashonan Uni fecha 14 dezember 1960; -ku insufisiensa di preparashon politiko, ekonomiko, sosial o edukashonal nunka lo mester sirbi komo preteksto pa retarda nos derecho fundamental sagrado di gobernashon-propio”

Mas alew, bo a deklara ku boso intervenshon no-demokratiko, gopi di estado, derokando e gobierno legitimo demokratiko di Sint Eustatius na febraury 2018, tabatin efekto disiplinario riba e gobierno di Bonaire, ya ku durante bo resiente bishita na Bonaire, e gobierno a papia masha amikabel. Esaki ta evidente pasobra e lidernan di gobierno di Bonaire, tur dos deputadonan, Sr Tjin Asjoe I Sra Den Heijer, ku nan vishon di subordinashon, ekpresa publikamente, ta ku “nos no por kome pan ku outonomia”

Na prome luga nos ta rekonose bo derecho di ekpreshon liber pesey bo tin mag di tin bo opinion personal riba e status I struktura illegal aki. Sinembargo nos lo ke trese na bo atenshon ku ni abo ni bo gobierno I bo gobierno amigu na Bonaire no ta possee derecho legal ni poder pa depriva e pueblo di Bonaire I e otro islanan BES, prinsipalmente Sint Eustatius di derecho di outo-determinashon I gobernashon-propio. Ambos den nan respektivo referendumnan di 2014 I 2015 a rechaza e status kolonial illegal impone aki I ambos isla nan parlamentonan komo representante di nan pueblonan a ratifika esakinan komo desishonan legal demokratiko di e pueblo.

Na lugar di yuda I asisti nos islanan pa mejora nos outonomia, bo gobierno, miembro di Konseho di Seguridat di Nashonan Uni, a limita e desaroyo direkshon di mas outonomia I awor ta deklara ku nunka mas nos lo rekupera nos outonomia bek. Esaki ta konstitui di un violashon grave di e Tratadonan di Reino basa riba akuerdonan firma den Nashonan Uni na 1954. Bo gobierno su kontinuo desishonan I akshonan irresponsabel I no-demokratiko a kausa un retraso den gobernashon di e islanan ku a resulta den re-kolonisashon ku ta violando Karta di Nashonan Uni, spesialmente artikulo 73, kapitulo XI I artikulo 103 , kapitulo XVI, I resolushonan 742, 747, 945, 1514 I 1541, tur ku relashona ku e derechonan sagrado di e pueblonan di Bonaire I Sint Eustatius.

Nos historia kolonial mutuo, ku bo a bisami personalmente ku bo no sa di dje I ku no ta interesa bo tampoko, ta uno hopi skur, ku bo gobierno legalizando krimen I inhumanidat, boso leynan pa piratia, kontrabanda(droga), trafikashon-di-katibu, hasiendo boso e kolonisado di mas kruel di historia di mundu. Nos lo por a spera ku tempu boso lo a krese madura sali for di e horososo kultura barbaro aki, I sivilisa, pero bo resiente deklarashonan a ekspone boso berdat atrobe, ku nada no a kambia durante siglonan, I ku boso a bisti e sakeado di e indefenso pueblo di Bonaire un bachi.

Nos kontesta ta sitando Ghandi: “ku a lo largo di historia e kaminda di berdat semper a triunfa. Tabatin tyran-nan I asesino-nan, ku pa un tempo, a parse ta invensibel, pero na final, tur a kai”
Nos e pueblo di Bonaire ta mantene nos speransanan haltu ku “nos lo truinfa” I ku boso lo respeta, proteha I kumpli ku nos derechonan hereda I atkeri. Nos ta possee e mesun derechonan ku abo, pa ta mes liber I mes igual I mes humano ku abo mes I tur suidanonan Hulandes-Oropeo di Reino. Nos ta urgi e komunidat internashonal pa ta konsiente di e status illegal kolonial ku nos pueblo a hanja nan mes aden aki.