Na:
Sr Knops, Sekretario di Estado di Relashonan di Reino
Sra.Van Ark, Sekretario di Estado pa Asuntonan Sosial I Empleo
17 September 2018
Topiko: Yudansa Hulandes o rekolonisashon di e anterior Antia Hulandes?
Estimado Sr Knops I Sra Van Ark,
Nos a tuma nota di varios ekspreshonan, deklarashonan I publikashonan ku a sali enkuanto e ultimo reunionan tene na Bonaire I Den Haag ku a alarma nos.
Riba 6 september, Sr Knops a bishita Bonaire den konmemorashon di e deskubrimento di nos isla riba e mesun dia na 1499 I a komporte na manera similar ku su ansestornan a hasi durante siglonan despues di kolonisashon di nos islanan: e la bini pa inspekshona ku e politikonan I gobierno lokal subordina ta kumpli ku instrukshonan di e maestro kolonial. E gran notisia ku e maestro kolonisado, Sr Knops, tabata satisfecho a wordu selebra ekstensamente dor di dje I e sumiso I subordina gobierno Boneriano, humiyando e pueblo di Bonaire riba nan dia. Ironia di e tema di selebrashon “Di generashon pa generashon” no a bai perdi bao di e habitantenan ku di generashon pa generashon a sufri bao di e yugo I dominio kolonial. Sr Knops, fiel na su tradishon kolonial a hasi algun promesa na nos politikonan-limosnero ku por yuda nan gana e elekshonan ku ta na kaminda, I Sr Knops a briya, komo ehempel di e generashon nobo di kolonisadonan Hulandes.
Bek na Den Haag siman pasa, despues di e show na Bonaire, tabata manera kustumber pa Sr Knops, e biaha aki asisti pa Sra Van Ark. Sin berguensa o resientimiento nan a para ariba ,nan tur dos, ku apesar ku tur raportnan ta mustra ku kasi mitar di e poblashon ta biba lew bao di linja di pobresa, ku no tin nesesidat pa alivio, no tin nesesidat pa un akshon rapido pa establese un minimo sosial pa garantisa un eksistensia humano. Den mesun linja di tradishon kolonial nan tur dos deskaradamente a akusa e habitantenan di e islanan ku ta nan mes ta kausa di pobresa. A bira evidente ku e maneho no ta pa eradika pobresa pero pa krea, promove I mantene pobresa. Pobresa ta un modelo di negoshi ekonomiko; e obhetivo ta pa tene I hasi nos pueblo pober pa ley I maneho pa por kolekta I hanja fondonan internashonal mester di pobresa. Sr Knops su deklarashonan ta basta kla: e no por hasi magia o tover I e no por move e punto na horizonte pasobra ta imposibel pa mantene nos pueblo den pobresa I alaves eradika pobresa na mes momento.
E hipokresia di Sr Knops a jega e punto mas haltu ora ku e la bisa ku e akshonan na Bonaire, St. Maarten I St. Eustatius no mester wordu konsidera komo rekolonisashon pero komo ayudo I asistensia pa e islanan. Ki yudansa Sr Knops ta eliminashon illegal di e gobierno demokratikamente elegi di St Eustatius I remplase nan ku personanan apunta pa Den Haag; ki asistensia ta pa deroka e gobierno elegi di St Maarten I forsa nan pa asepta medidanan kontra nan interes usando e kaos kausa pa Irma; ki yudansa ta e tiki sen ku lo gasta na luga di medidanan pa alivia pobresa ta wordu rechasa?
Pa termina, Sr Knops a atmiti na ami durante nos enkuentro Januari ultimo na Bonaire durante su bishita inaugural komo Sekretario di Estado ku e no sa I no kier sa di nos historia komun I pasado kolonial, I ku e ta wak solamente dilanti den futuro. Awor ami ta komprende pa su akshonan, ku e tin rason: e ta inosente, for di su perspektiva pasobra e ta akta di akuerdo ku su leynan. Pasobra kolonialsimo I rasismo ta parti integral di e mentalidat Hulandes, e ta inosente, meskos ku su antepasadonan, kaminda nos ansestornan pa nan konstitushon I leynan a wordu de-humanisa, deklara komo no-humano, I a wordu legalmente bende manera baka I haring. Pasobra e no sa e historia, ami lo ke rekorde, ku ta pa medio di e akshonan inhumano I kriminal aki, Hulanda di un pueblo piskado insignifikante a bira un di e paisnan mas riku di mundu; dor di sanger, sodo I lagrima di nos ansestornan esklavisa. E kompanianan VOC/WIC ta figura komo e kompania mas grandi di historia di mundu di tur tempu, 10 biaha mas grandi ku Microsoft I Apple, I nan no tabata bende software. Awor nos ta komprende dikon e no ke sa su historia. Ta pasobra e lo wordu konfronta ku su origin kriminal I lo ekspone su akshonan di awendia komo krimen kontra humanidat I no ta importa ku nan a legalisa nan komo aktonan konstitushonal, mesun metodo no masha diferente ku e Nazi-nan a legalisa nan akshonan kontra tur ku nan tabata konsidera ku ta pertenese na un rasa inferior.
Sperando ku e karta aki lo ta punto na horizonte ku lo krese konberti den un solo saliente ku lo briya e futuro I tira luz riba e pasado, pasobra skuridat no lo wordu eradika ku skuridat pero dor di luz. Hulanda ta firmante di e karta I tratadonan di Nashonan Uni I komo tal no por sigui ignora e violashon di e diferente resolushonan pa kaba ku gobernashon kolonial. Sr Knops I Sra Van Ark, boso ta den posishon pa realisa e kambio aki na nomber di Hulanda.
Atentamente,
James Finies