Inspekshon di labor ta dòbel e kantidat di agentenan ekstraordinario

Djaweps 12 di òktober señor B. Frans BSc i señor drs. L. De Jong a keda huramentá komo agente polisial ekstraordinario (Bavpollers) pa Hulanda Karibense dor di hefe di kuerpo polisial, señor J. Rosales.

E kantidat di inspektornan di Inspekshon di Labor ku tambe ta agente polisial ekstraordinario a dòbel asina. Duplikashon di e kantidat di agentenan polisial ekstraordinario ta pas den e maneho di e servisio pa sigui profeshonalisá mas. Profeshonalisashon ta dirigí riba tres punto: denter di inspekshon ta traha riba ampliashon di konosementu profeshonal pa loke ta trata kontenido di e materia; profeshonalisá e forma di proseder di e inspektor dor di duna treinen di abilidatnan di kontrol riba kumplimentu. E proseder ta rekerí táktika, rèspèt mutuo i si ta nesesario sanshon. Pa esaki e inspektornan tin mester di konosementu hurídiko. E estudio pa agentenan polisial ekstraordinario ta un parti di esei. Aparte di konosementu hurídiko general e inspektornan ta siña tambe kon pa traha prosèsverbal.

Splikashon
Pa duna un bista kla kiko inspekshon di labor ta hasi, ta importante pa informá tur hende kon inspekshon di labor ta hasi su trabou di kontrolá riba kumplimentu.

Inspekshon di labor ta kontrolá si ta kumpli ku leinan riba tereno di labor i areglonan sosial ku unidat di SZW ta ehekutá. Ta trata di leinan riba tereno di siguridat laboral, oranan di trabou i di sosiegu, estranheronan ku ta traha, leinan tokante pèrdida di suèldu, suèldu mínimo i retiro.

Punto di salida general di gobièrnu ta: konfiansa den siudadano- i kompanianan. Kompania- i siudadanonan ke komportá nan mes sosialmente responsabel i kumpli ku e lei i regulashon. Kaminda ku esaki no tuma lugá, inspekshon di labor ta aktua. Pa kontrol riba kumplimentu Inspekshon di labor ta disponé di algun instrumento ku por usa pa forsa kumplimentu ku lei.

Atvertensia: ta ser usá ora tin asuntu di violashon leve riba e tereno di siguridat laboral, oranan di trabou, suèldu mínimo i otro kondishon laboral. Ta duna e kompania tòg oportunidat pa eliminá e violashon. Ta pone e violashon den un karta di atvertensia i ta duna un término den kua mester a eliminá e violashon.

Instrukshon: ta ser duná riba tereno di seguridat laboral den kasonan unda no tin un peliger serio dirèkt pa personanan pa kua lei òf regulashon no ta kontené stipulashonnan konkreto.Ta stipulá un término den kua e violashon mester ta eliminá i ta indiká konkreto kiko e dunadó di trabou mester hasi pa eliminá e violashon.

Òrdu pa para e trabou: ta sosodé si inspekshon di labor husgá ku kuminsá òf sigui ku e trabou ta trese peliger serio pa e personanan. Keda sin kumpli ku e órden duná ta un delitu.

Revokashon di pèrmit di trabou: ta na vigor si no kumpli ku e kondishonnan di e pèrmit òf si ta hasi mal uzo di e pèrmit. Tambe Inspekshon di labor por konsehá e hefe di e unit di SZW pa no duna un kompania pèrmitnan di trabou debí ku e atministrashon rondó di labor di parti di estranhero di e kompania no ta na òrdu. Intenshon di suspenshon di dunamentu di pèrmitnan di trabou ta pa duna e kompania oportunidat pa drecha e proseso di hasi petishon pa pèrmit.

But atministrativo: por ser duná si un dunadó di trabou no ta kumpli ku e asina yamá leinan di pèrdida di suèldu. Inspekshon di labor ta traha un rapòrt di but. Despues e hefe di e unit SZW na nòmber di minister ta duna e dunadó di trabou un but. E manera di traha aki ta komparabel ku trahamentu un prosèsverbal. Ta kaba atendé esaki di forma atministrativo.

Prosèsverbal: ta duna notifikashon di esaki ora ku tin echonan kastigabel spesífiko i residivismo múltiple. Ta trata e ora ei entre otro di labor ilegal den kuadro di e Lei labor estranheronan BES (Wet arbeid vreemdelingen BES). Aksidentenan serio den kuadro di Lei siguridat laboral BES (Arbeidsveiligheidswet BES) manera: aksidentenan ku resultado fatal, delitunan hopi serio òf aksidente ku leshon permanente. Tambe ta duna notifikashon di prosèsverbal si un dunadó di trabou no a duna oido na un aviso òf instrukshon previo. Tambe ta duna notifikashon di prosèsverbal si ignorá e òrdu pa para e trabou. Ministerio Públiko ta kaba hasi e trámitenan.