Durante diferente enkuentro resien, kolaboradónan di ministerio di Enseñansa, Kultura i Siensia (OCW) a diskutí un konsepto di e manual pa personal ku tur e direktivanan di skol riba e tres islanan. Durante e enkuentronan aki a wak konhuntamente si tin adaptashonnan ku mester hasi.
E manual pa personal ta deskribí e derecho i debernan di e personal den enseñansa riba e islanan. E posishon hurídiko di e personal den enseñansa ta un materia basta amplio. E kondishonnan laboral ta hinká den diferente areglo. Den e anekso di e manual por haña un bista total di e areglonan mas importante. Ademas e areglonan akí ta públiko i tur hende por konsultá nan riba internèt (http://wetten.overheid.nl).
Realisashon di e manual pa personal aki ta un di e akshonnan ku tin den e agènda di enseñansa pa Hulanda Karibense pa añanan 2017 te ku 2020. Den e agènda di enseñansa tin akshonnan ku ta dirigí riba sigui drecha e kalidat di enseñansa. Huntu ku esei tin atenshon tambe pa algun kondishon esensial, por ehèmpel riba tereno di kondishonnan laboral. E manual pa personal tin komo meta pa yuda yega na ehekushon korekto di e akuerdo di kondishonnan laboral. A logra e akuerdo akí den un deliberashon ku ta karga e nòmber ‘Op Overeenstemming Gericht Overleg’, ku e direktivanan di skol, e sindikatonan i e entidatnan públiko ta forma parti di dje. E manual ta indiká kua kondishonnan laboral ta konta pa e personal den enseñansa, manera informashon tokante rekompensa, gratifikashon i tiponan di verlòf.
E manual pa personal ta destiná pa tur trahadó den enseñansa na Bonaire, Saba òf Sint Eustatius, ku ta den servisio di un skol públiko òf partikular, ku gobièrnu di reino ta finansiá. Ku personal den enseñansa, ta referí na e direktor, e direktor athunto, e dosentenan i tur otro trahadó ku nan trabou ta sostené enseñansa.
E konsulta tabata útil i a duna hopi aporte pa por realisá e manual aki. Tabatin hopi pregunta i petishon pa agregá kosnan i tambe remarkenan krítiko. OCW lo prosesá tur loke a bin dilanti, pa asina mas lat den e aña akí por keda kla ku e vershon definitivo di e manual pa personal. Promé ku finalisá ku e manual e ministerio lo bai sondia te kon leu e lei pa ámtenarnan ta konta pa personal di skolnan partikular (kaminda enseñansa ta basá por ehèmpel riba un vishon religioso).