Minister di Asuntunan Interno i Relashon di Reino, señor Ronald Plasterk, a inisiá su biahe di despedida di e islanan di Hulanda Karibense na Saba riba djaluna 14 di ougùstùs. Den reunionnan ku konseho insular i kolegio ehekutivo di e entidat públiko di Saba, a resultá ku entre otro e resultadonan di e añanan tras di lomba, e bon relashon di trabou entre e dos partidonan, i áreanan ku ainda mester di mas desaroyo i adelanto tabata e tópikonan mas importante di e kombersashon.
E minister tabatin hopi elogio pa e aserkamentu Sabano pa traha huntu ku e ministerionan di e Gobièrnu Hulandes. “Mi ta apresiá e manera profeshonal i práktiko ku boso ta atendé boso asuntunan. Keda mantené e nivel di optimismo aki”. Ámbos partido ta rekonosé ku miéntras ya a logra hopi kaba ainda tin e ambishon pa asta logra mas den futuro serkano. E minister a enfatisá ku miéntras kisas e hendenan no ta sinti e resultado direktamente den nan propio saku, te ku e dia di awe ainda por proba ku tin un mihó salubridat públiko, edukashon grátis, kamindanan mas hanchu, elektrisidat bou di tera i mas. E minister ta sigurá e gobièrnu di Saba ku ta bai sigui ku mas invershon i desaroyonan.
E konseho insular i e kolegio ehekutivo ta puntra ki momentu lo implementá e resultadonan di e rapòrt Spies. Sigun minister Plasterk resientemente a inisiá esaki pa via di un plan di mas aña ku na e momentunan aki ta ehekutá riba kada isla. Ademas ela remarká ku e kaminda den adelante lo reflehá den e aserkamentu pa traha huntu ku kada entidatnan públiko. E bishitanan di mitar aña na e islanan pa reunionnan di trabou entre kada entidat públiko, e direktor general di e ministerionan na e CN-tafel i e Direktorado Relashon di Reino tin e aspirashon pa e meta aki.
Den e reunion a enfatisá tambe e asuntunan ku ta trata di e fasilidatnan sosial, e nivel di e kompensashonnan liber( vrije uitkering) i e redukshon den penshun. Plasterk a hasi e petishon na representantenan pa no aseptá e suposishon ku nada no a kambia na Saba den e añanan tras di lomba. Koriendo rònt riba e isla por mira tantu kambionan positivo. “Saba ta riba e bon kaminda. Sigui bai den e direkshon ei.” E minister i e delegashon a biaha pa Sint Eustatius riba djaluna mèrdia pa deliberashonnan similar ku e konseho insular i e kolegio ehekutivo.