Djaluna mainta 42 studiante di un total di 84 studiante di Hulanda Karibense a yega Schiphol seif. E studiantenan a yega ku dos vuelo, ku a yega 6.40 or i 11.05 or di mainta ora di Hulanda. Na aeropuerto, representantenan di Aalse & Partners a risibí e grupo aki ku a skohe pa haña guia. Di e 42 studiantenan ku a skohe pa bai Hulanda bou di guia, 32 ta di Boneiru, 7 ta di Sint Eustatius i 3 di Saba. E sobra 42 studiantenan a skohe pa bai Hulanda sin guia.
A transportá e studiantenan ku bùs pa hostel WOW na Amsterdam, kaminda nan lo keda pa tres dia. Durante di nan estadia nan lo topa ku nan mèntòr, nan lo haña mas informashon i nan lo risibí nan pólisa di seguro médiko. Tambe nan por habri un kuenta di banko i den algun kaso firma kontrakt di hür pa kamber di studiante. Seguidamente kada studiante ta risibí un karchi di SIM pa via di telefòn selular keda den kontakto ku famia na kas.
Na yegada na e hostel tabatin un seremonia di bon biní ku un bufèt. Djárason e studiantenan bou di guia ta bai na e munisipio ku nan ta bai studia. E studiantenan nobo ta haña guia entre otro riba e parti di inskripshon na e munisipio kaminda nan ta bai biba i informashon tokante di e siudat, siña hasi uso di transporte públiko i kon pa muebla nan kamber. Tambe ta yuda nan kontrolá inskripshon na e instituto edukashonal di nan eskoho i ta siña nan konosé e kultura Hulandes.
Banda di e studiantenan ku a skohe pa sigui estudio na Hulanda, tin tambe studiantenan ku a skohe pa bai studia na Merka i den region. Na e momentunan aki ta trata di mas ku i 60 studiante di kua 40 ta bai studia na Kòrsou.