E “Instrukshon Violensia Relashonal” (Aanwijzing Relationeel Geweld) di Kòrsou, Sint Maarten i Boneiru, Saba i Sint Eustatius (islanan BES) ta drenta na vigor dia 1 di yüli 2017. E instrukshon nobo ta remplasá e “Richtlijn geweld binnen de relationele sfeer Curaçao” di 2006 i “Richtlijn huiselijk geweld en eergerelateerd geweld van het OM Nederland” (2010A010). E instrukshon nobo ta konforme artíkulo 5 lid 4 di Rijkswet Openbaar Ministeries emití dor di Prokuradó-general di Kòrsou, Sint Maarten i Boneiru, Saba i Sint Eustatius. Ku e terminologia “violensia relashonal” ta klarifiká ku violensia no ta tuma lugá solamente den kas. Ta trata di violensia ku ta kousá dor di un persona denter di un relashon di famia òf amoroso di e víktima, irespekto e lugá na unda e violensia a tuma lugá. E meta di e instrukshon ta pa tin uniformidat miéntras ku denter di polis i Ministerio Públiko ta aktua mas efisiente i efikas komo reakshon riba violensia relashonal. Den kombatimentu di violensia relashonal ta di importansia pa evitá residivismo. Instansianan di ayudo pa sospechoso i víktima tin ku ser envolví mas trempan ku ta posibel. Violensia relashonal ta un prioridat di Ministerio Públiko den 2017. Violensia denter di e esfera relashonal ta un problema grandi den nos sosiedat. Kasonan ku ta tuma lugá hopi pero hopi biaha ta keda skondí. Ministerio Públiko ke sali na defensa di e grupo vulnerabel aki.
E instrukshon nobo aki ta pone regla pa investigashon i persiguishon den kuadro di violensia relashonal. A formulá kondishonnan esensial den kuadro di violensia relashonal. A formulá e manera di koperashon entre polis i Ministerio Públiko i otro partner manera reclassering di Kòrsou, Sint Maarten i Boneiru, Saba i Sint Eustatius.
OM ta konsiente ku e instrukshon pa Sint Maarten ta limitá den su ehekushon, pa motibu ku Slachtofferhulp (Yudansa na Víktima) ta den su estado di lantamentu. Ministerio Públiko ta spera ku pronto Yudansa na Víktima na Sint Maarten ta bira realidat / OM gustosamente ke yuda den realisashon di esaki.
Si bo ke sa mas tokante hasi denunsia di violensia relashonal, òf si bo ke lesa e instrukshon, bai e wèpsait: http://www.openbaarministerie.org/nl/ppg/richtlijnen