A yega punto mas haltu di Kolegio Rayo di Solo

E bario Antriol Pariba tabata un ratu di fiesta atrobe riba 23 di mei. Na momentu ku Dali (Rudaliah) Mercelina a pone e último plachi di dak, a yega e punto mas haltu di e proyekto di konstrukshon “Renobashon Kolegio Rayo di Solo”.

Dali mes a haña edukashon na skol básiko na Kolegio Rayo di Solo. Na e momentunan akí Dali ta pone su konosementu na disposishon komo parti di e tim di proyekto. Ei den e ta representá direktorado di Espasio i Desaroyo, Maneho i Proyektonan di OLB (entidat públiko Boneiru).

 

Direktor Enigma Giskus di Kolegio Rayo di Solo tambe ta forma parti di e tim di proyekto. Enigma Giskus ta representá e skol den e tim di di proyekto, huntu ku Eveliene Coenen, Direktor General di Fundashon Enseñansa Públiko Boneiru. Enigma gusta wak alumnonan ku e mes a eduká na su skol bèk den un papel kaminda nan ta traha riba futuro di Boneiru i ta traha ku éksito riba nan karera.
E seis edifisionan di skol eksistente di Kolegio Rayo di Solo ta ser renobá drástikamente kaminda ta kambia e daknan kompletamente i lo instalá instalashonnan di èrko i ventilashon. Lo traha un parti habrí kubrí ku afdak aserka. Segun planifikashon lo tuma e skol den uso na komienso di aña eskolar 2017/2018. E skol tin kapasidat pa alrededor di 320 mucha.
Realisashon di e proyekto di konstrukshon akí ta parti di e plan di alohamentu pa enseñansa pa Boneiru, finansiá konhuntamente dor di entidat públiko Boneiru i Ministerio di OCW (Enseñansa, Kultura i Siensia). Rijksvastgoedbedrijf ta koordiná ehekushon di e diferente proyektonan ku ta forma parti di e plan akí na nòmber di entidat públiko Boneiru i OCW. E diseño ta di Streefkerk Architects + Consultants di Boneiru. E kontratista Constructora Tecnica Silvousa ta ehekutá e renobashon di Kolegio Rayo di Solo.